BISMILLAHIR RAHMANIR RAHEEM
Ya Allah yi salati da aminci bisa Shugaban dukkan halittunka Annabi Muhammadu tare da iyalan gidansa tsarkaka da Sahabbansa masu albarka.
Wannan shine darasi na shida acikin karatunmu na HALAYEN MANZON ALLAH (SAWW). kuma har yanzu muna magana ne akan hakurinsa.. (saww).
Yau insha Allahu zamu duba mu kalli irin hakurin da sauran Annabawa da Manzanni da kuma magabata na kwarai sukayi bisa Jarrabawar da Allah yayi musu ta jinya, ko kuma chutarwa daga al'ummarsu.
Misalai ne zamu kawo daga rayuwarsu domin hakan ya zama abin koyi agaremu domin karfafar Imaninmu aduk sanda muka tuna dasu.
1. Misali na farko: lokacin da Annabi Ayyub (as) yake jinya sai matarsa da taga abin ya tsananta sai tace masa:
"Mai zai hana ka roki Allah ya yaye maka wannan jinyar da take damunka? "
Sai yace mata : "KAICHONKI!! Mun kasance acikin ni'ima har shekara saba'in. Mai zai hana muyi hakurin wannan jinyar har kwatankwacin haka kafin mu rokeshi ya yaye mana!".
Bai dade sosai ba sai Allah ya yaye masa cutar, ya warkas dashi.
To kunga wannan yana karantar damu cewa idan musiba ta sameka, kar ka manta da shekarun da ka gabatar cikin ni'ima da jin dadi..
2. MISALI NA BIYU: Lokacin da Sayyiduna Abubakrin yake jinyarsa wacce ya rasu acikinta, wasu daga cikin jama'ar Sahabbai (ra) sun shiga wajensa domin su gaisheshi. Har suka ce masa:
"MAI ZAI HANA MU KIRA MAKA LIKITA DOMIN YAZO YA DUBAKA, YA KHALIFAN MANZON ALLAH (SAWW)!
Sai yace musu "Ai ni likitana ya riga ya dubani tuntuni. (Yana nufin Allah kenan SWT).
Sai suka tambayeshi "kuma menene likitan naka yace maka?".
Sai Sayyiduna Abubakrin yace "YACE MUN SHINE MAI AIKATA DUK YADDA YASO".
Allahu AKBAR!!! Kunga wannan yana karantar damu cewa ko yaushe mumini ya rika kyautata zatonsa ga Allah (swt) duk halin da yake ciki.
3. MISALI NA UKU: Lokacin da Sayyiduna Abud Darda'i (ra) yayi jinya, sai Abokansa da almajiransa suka shiga domin gaidashi. Suka tambayeshi "Menene yake damunka ne Ya Abad-Darda'i?".
Sai yace "Zunubina ne yake damuna".
Sai suka ce "To mai kake kwadayi yanzu haka?" (suna nufin abinci ko abinsha..)
Sai yace musu "Aljannah nake kwadayi".
Sai suka sake tambayarsa "Ko mu kira maka likita ne?"
Sai yace "Ai likitan nawa shine ya kwantar dani anan (wato Allah kenan).
4. MISALI NA HUDU : Yayin da Annobar wata cuta ta shiga garuruwan Shaam (Syria) sai Sayyiduna Mu'az bn Jabal (ra) yayi addu'a yana cewa: "YA ALLAH KASA IYALAN MU'AZU SU SAMU KASO MAFI TSOKA DAGA WANNAN ANNOBAR".
Acikin wannan ANNOBAR 'ya'yansa mata guda biyu duk suka rasu..
Sannan 'Dansa namiji mai suna Abdurrahman shima chutar ta sokeshi. Sai yace ma Uban "GASKIYA CE DAGA UBANGIJINKA. KAR KA KASANCE DAGA CIKIN MASU KOKWANTO".
Sai shi kuma Uban (ra) yace : "DA SANNU ZAKA SAMENI ACIKIN MASU HAKURI". (wato dukkansu sun karanto ayoyin Alqur'ani ne).
Shima Mu'azun (ra) sai chutar ta kamashi a hannunsa. Abun yayi tsanani.. Yana gab da rasuwa sai aka ji yana cewa:
"YA UBANGIJI, KA SHAKENI MUTUKAR SHAKEWA DA WANNAN CHUTAR. AMMA INA RANTSUWA DA GIRMANKA, KAIMA KA SAN CEWA ZUCIYATA TANA CIKE DA SOYAYYARKA"
ALLAHU AKBAR!!! kunji bayin Allah na gaske!! Yayin da bala'i ya hau kansu, sannan suke Qara nuna soyayyarsu ga Allah din..
5. MISALI NA BIYAR : Lokacin da Sayyiduna Umar (ra) yana khalifanci, Uyainatu ya shigo wajensa yace masa "YA KAI 'DAN KHATTABI!! BAKA BAMU KASONMU BA, KUMA BAKA YI MANA HUKUNCI DA ADALCI!!".
Sai aka ga Sayyiduna Umar ransa ya baci sosai yayi fushi. Har ya zare takobi zai yi kansa, sai Hurru bn Qaysin (daya daga cikin masu bashi shawara) yace masa:
"Ya kai Sarkin Muminai!! Hakika Allah yace ma Annabinsa (saww) : "KAYI RIKO DA AFUKA, KAYI UMURNI DA ALKHAIRI, KUMA KA KAU-DA KANKA DAGA JAHILAI".
To hakika wannan mai maganar yana daga cikin Jahilai.
Daga jin haka sai Sayyiduna Umar ya koma ya zauna.. Bai tsallake wannan shawarar ba. Dama yana daga cikin halayensa, shi mai tsayawa ne bisa littafin Allah.
Imamul Bukhariy ya kawo wannan Qissar akan lambar hadisi na 4,642. D Da kuma na 7,286.
6. MISALI NA SHIDA : Sayyiduna Zaidu bn Arqam (ra) yace :
"Idona sunyi ciwo sai Manzon Allah (saww) yazo gaisheni. Sai yace min "YA ZAIDU, IDAN DUKKAN IDANUWANKA SUKA TAFI YAYA ZAKAYI?".
Sai nace "Zan kasance mai hakuri kuma mai neman lada awajen Allah".
Sai Manzo (saww) yace "IN DAI KAYI HAKA, TO ZAKA SHIGA ALJANNAH BA TARE DA HISABI BA".
Hakan kuma ta faru dashi. Ya makance bayan Wafatin Manzon Allah (saww). Sannan daga baya Allah ya dawo masa da ganinsa.
ABIN LURA: da yawa idan an karanto Qissa ko tarihin magabata, sai kaji mutane suna cewa ALLAH SHI BAMU ALBARKACINSU".
shin zaka samu albarkacinsu ne ba tare da ka kwatanta aiki irin nasu ba?!
Ya kamata mu rika daukar darasi daga rayuwarsu da zantukansu. Kamar yadda suma suka dauki darasi daga Rayuwar Fiyayyen Halitta (saww) da kuma Qissoshin cikin Alqur'ani mai girma.
Anan zamu tsaya da fatan Allah shi amfanemu daga abinda muka karanta.
